منقول
الدنيا وقت كان بخيرا أنا والطريفي صاحبي أي رقيص عروس في الحلة بنحضرو
قبل الصالات وكاميرات ألموبايلات دي الرقيص والعيد كان عندنا واحد
كان بنعرف من أخواتنا الكبار منو العايزين يعرسوها وعرسا قرب
هسي الناس الماشة عرس بسالو يقولو ليك الحفلة بي منو ؟
نحن كنا لا
أنا والطريفي بنقول البعلما منو 
زمان الناس دي كلها بترقص
البلد دي كان فيها تلاته
قسمة وبهاء وفائزة عيسى
كانو مثلث رعب كده في رقيص العروس
العروس لمن تكون في حلتنا نحن بنحضر لينا زي تلاتين يوم تعليمة والتعليمة ألأخيرة القبل يوم الرقيص دة أنا والطريفي بنترتر عديل
بنمسك الرقيص ده من مبروك عليك الليلة يا نعومة لغاية اللبسة التالتة الغنية الأخيرة بتاعت
مع السلامة وابقي زي ما قلنا ليك
خلي بالك من عريسك ومن نسابتك و الحواليك
الزمن مشي بينا وكبرنا شوية حرم علينا خلاص نحضر لينا رقيص تاني
يوم جاني الطريفي يضحك قالي لو قلتا ليك العايزين يعرسوها منو ما بتصدق ؟
قلتا لي منو ؟؟؟؟
قالي مهجة العوقة
مهجة يا جماعة من هي شافعة لطاخة السواد لكن من سننا وقدرنا وصاحبتنا
بترضع لمن عمرا حصل اربعه والبزة دي بسوطوها ليها لي خامسة ابتدائي
أهلها من حلالات الريف الشمالي وفي واحد من تجار الشنطة البمشو سوريا شافا وقال عايز يتزوجا
قالو أبوها لمن جا يشاورا اول سؤال سالتو أبوها قالت لي أبوي
بخليني ارقص
تحت تحت في ونسه أماتنا سمعنا مهجة عايزة ترقص
قلتا لي الطريفي عاد ده حدث بحصل كل مية سنه مرة ما بنفوتو
مهجة بدت تتعلم قبل قولة الخير
عقدو عليها و سدو مالا شهر سته
مهجة اجلت العرس من شهر تمنية لي شهرة عشرة عشان ما أتعلمت
أي فنانة جابوها ليها بتاخد أسبوعين وبتفوت منها قنعانه انو هي ما حتتعلم لمن جأت قسمة بنفسا قالت بعلما
مهجة بعلمو فيها اربعه شهور باقي ليها عشرة يوم وتبقي متل المرا الطالعه من بيت حبس
بنات الحلة جت الكانن بحضرن معاها التعليمة اتعلمن الا هي متل الصنم
ترترة ورا ما بتعرف ترترة قدام اليخربا
غايتو بعد مراق روح مهجة دي اتعلمت ليها ستة رقصات قالو بس خلاص ترقص بيهن
رقيصا كان صبحية العرس
انا والطريفي العرس زاتو ما مشينا
عاد نحن ناس رقيص ساي وعايزين نرجع الماضي
الطريفي قالي خلي بالك نحن الرقيص دة الا نحضرو من سطوح ناس الهام
قلتا لي الهام دي شفعا مسلطين وبعرفونا وبفضحونا
نحن بس نحضرو من عريشة حبوبتك بي فوق لانو باقي البيت زنك لو طلعنا اي راس بيت بكون في كركبة واخير لينا شفع الهام من كركبة الزنك
اها يوم الرقيص دة انا والطريفي من العصر لابدين في راس البيت لي المغرب حتي جهزو الحوش للرقيص وجابو ليك مهجة دي ملفحة زي عمر المختار
الغنية الاولي
يمة الليله يوم سفرو
ما ودعنا قام قطرو
غنيه خفيفة ومهجة لسة مغتغتة
الغنية التانية
اللابس الاخدر
انا ما بقدر
عندو سماعه
معاها قطارة
دكترة دكترة دكترة
وترترا ترترا ترترا
اهاا الترترة التالته دي مفترض تفك فيها ربطة التوب
التوب ابا يتفكا
انا والطريفي قربنا نفلقا
الناس دي كلها ملاوزة الرقيص الفي راس مهجة يطير
وقسمة شغالة
شايل مسطرة
معاها منقلة
وهندسة هندسة هندسة
غايتو ترترت هندسة دي فكت التوب وفكت مهجة زاتا
والله مهجة تاني يوقفا الله
رقصت الفي المقرر والبرة المقرر
مهجة بتمشي تقول لي قسمة عيدي لي الغنية دي تاني
والله رقصت رقيص
شاتت الرقيص بي لبسة واحدة
اخواتا يكوركو ليها مهجة الغيار والتلبسية التانية
مهجة تعمل حركة المكاواة البي اليد ديك ومعاها دقة رجلا اليمين في الواطة
مهجة دي بتمشي هناك وتجي راجعة وانا والطريفي من سبلوقة االعريشة لي سبلوقة الصالون مرازة معاها
الزنك زاتو نسيناهو
بعد شوية قسمة قالت
وحدوووووه
انا والطريفي فوق رفعنا يدينا و بي صوت واحد
لا اله إلا الله
وبقينا نقول
وري وري يا مهجة
وري وري يا مهجة
يمين الله الشباشب والجزم الاتفلقنا بيها تفتح بترينة في الشعبي
ما مغسني الا دكتور شول عمتي الاحمر جاني في صمة خشمي
والمهيرة مهيرة القصيص
انتي الملكة وحرس انجليزي
حكوووومة يا عروسنا
عريسك غلبو الثبات
